Leck, 16. Mai 2022
Leve Förderers vun dat Plattdüütsch-Zentrum!

Anners as letztjohr könen wi siet Anfang April ahn Oplagen unse Veranstalten dörföhren – wat en Freud! Unse eerste „platt drift barcamp“ weer en grote Erfolg un de Kurs „Platt för de Lütten“ is ok wedder vull un siet Anfang Mai in de Gang. Över en Deel vun dat, wat in de nächste Tiet nu ansteiht, muchen wi Jem mit düsse Breef informeren un inladen dorbi to sien:

Vör Pingsten löppt vun de 30.05.-3.06. dat eerste Mal de Kurs „Platt-Land-Küst“ an de Nordsee Akademie, en Wuch, de jüst ok för Plattinstiegers lohnt. Kennen Jem welken, de dat goot weten kunnen? Denn geern noch wiedervertellen! Bi en poor Exkursionen könen ok geern noch Lüüd dortokamen. So geiht dat Dingsdag, de 31. Mai Klock negen (9.00) vun Dagebüll ut to Foot „Op Platt dör’t Watt“ na de Hallig Oland. Vun Küstenexperte Walter Petersen-Andresen kriegen wi dorbi veel to weten över Lüüd un Leven. Mit Schipp geiht dat namiddags wedder torüch. Middwuch, de 1. Juni, Klock dree (15.00) gifft dat en plattdüütsche Föhren in Flensborg un avends (19.30) kieken wi in dat Studio vun de Nedderdüütsche Bühn dat Stück „Bella Butenschöön“. Is dat nich en dulle Programm?! To all düsse enkelte Delen könen Jem sik noch bet to de 23. Mai in’t Plattdüütsch-Zentrum anmellen.

För de Kurs „Platt lehren lehren“ (24.-26. Juni) hebben wi noch en ganz poor Plätze frie (Beschrieven hier). Deelnehmers, de Liddmaat sünd in unse Vereen, stütten wi opto mit 30 €.

Na dat de Veranstalten „Friesisch trifft Plattdeutsch“ letztjohr so goot ankamen is, hebben wi mit unse Kooperatschoonspartners wedder en Namiddag ünner düsse Motto för de 11. September plaant –  hier en Programmfleger.

Opropen hebben wi to de intwischen 4. Utgaav vun de Wettstriet för plattdüütsche Kortfilme, PLATTSPOTS. Wo um dat dorbi geiht steiht hier to lesen, geern wiederseggen – un mitmaken! Bet to de 1. August mööt de Bidrääg inlangt warrn, an de 18. November warrn de nomineerten Filme bi de Flensborger Kortfilmdaag in’t Kino 51-Stufen wiest un de Priesen utgeven.

Ankünnen muchen wi al mal de Termin för unse nächste Johrsversammeln: De wüllt wi Sünnavend, de 29. Oktober 2022 in Rieseby afholen. Inladen kummt noch extra, is kloor.

Toletzt hebben wi noch en Anlingen: Wi worrn uns freuen, wenn wi Jem Informatschonen un Inladens in Tokunft grundsätzlich över Mail tokamen laten dorven. Wenn Jem dormit inverstahn sünd, denn bruken wi dorto en Opdrag. Schickt uns bidde en Mail an info@plattdeutsches-zentrum.de wo Naam, Adress un Telefon- Nr. binnen steiht un dorto de Text: „Schicken Se mi bidde tokamen Informatschonen un Inladens per E-Mail to.“  Geiht natürlich ok op hochdüütsch: „Senden Sie mir bitte zukünftig Informationen und Einladungen per E-Mail zu.“ 

Bi allens, wat wi in düsse Breef beschreven hebben, hett de Fördervereen un hebben dormit Jem as sien Maten ehren Part in. För de Rüchwind för unse S(pr)aak bedanken wi uns düchtig un schicken in de Runn
hartlich Gröten

Truels Hansen
1.Vörsitter Fördervereen
Gesa Retzlaff
Leid Plattdüütsch-Zentrum